麵餐

為了健康，晚餐都減少外食，收工回家都快8PM，可以好快有得食就係煮個麵淥條菜，用Airfryer烤肉。

有味飯

電飯煲的發明是非常之偉大，收工回家，洗米後加埋健康的三色藜麥，水滾後加入去皮雞肉及臘腸，簡易的有味飯就完成。再焯個青菜又一餐，比茶記的來得健康，少味精!

加工食品

一向鍾情加工食品，火腿同腸仔真係可以食唔停口，在FB 見到有人買左silicone mold 來整，我怕自已3分鐘熱度，無買腸衣(要浸要洗好煩)，唔想買silicone模(怕膠會溶又怕家裡多件垃圾)，一於試用微波爐保鮮紙。

材料
免治豬肉2包
蒜泥約2茶匙
啡菇1盒

調味
A. 醃肉
豉油+糖+胡椒粉+麻油+紹酒適量 (當醃肉餅)

B. 拌肉
青紅花椒各1茶匙
幼麥皮2湯匙
鷹粟粉1茶匙
水1茶匙

做法
1. 將已調味免治肉加磨菇及B. 打碎

2. 用微波爐保鮮紙包成腸仔理，頭尾打個結防漏餡

3. 將包好的腸仔放雪櫃一晚定型

4. 隔水蒸6min,將腸仔蒸至8成或全熟 (視乎腸的大小而定)

5. 放Airfryer 以200度烤8分鐘

善用airfryer

從第一代Airfryer 用起，到現在換了另一台容量大的，一直覺得非常好用，這幾個月，就連煎魚也由AF，代勞真的非常方便，省去很多工序，但事後清洗仍然。。。。

潮洲粉果

在街市買了一個小的沙葛，再戰Q 彈的澄麵皮，這次試試潮洲粉果吧

皮材料
澄麵 70g
生粉 90g
粟粉 60g
水 180g
鹽 1/8 茶匙
油 6g


饀料
沙葛一小個
蝦米
韮菜
豬肉粒
菜莆

AF 薰魚

用Airfryer將鯇魚腩炸脆，用糖醋汁煮滾後隔晚才吃，非常的入味。 那個糖醋汁是我胡亂的自行煮出來，靈魂是中式的鎮江黑醋，之前用洋貨的無花果醋，做出來的味道不夠酸，魚帶甜味多一點，這次刻意到雜貨店買支鎮江黑醋，成件事美好晒~

用日本買回來的櫻花蝦煮的菜飯，淡淡的鮮味，很不錯

味噌

最近都是懶懶懶，很少煮些新菜式，這天用日本味噌做了 栗子牛蒡蒟蒻炆豬腩肉，我還是第一次用味噌這種煮法，味道有點像韓麵醬。 是夜還有沙葛炒雜錦配上有枸杞魚湯。

家常菜

為左健康多留在家中自煮，這天有鯇魚片蒸水蛋+洋葱薑黃豬扒+節瓜魚湯

滑滑水蛋用鑊蒸9分鐘再焗2分鐘，剛剛熟透，晃動碟邊水蛋還會跳彈，哈哈😀😋

椰菜豬肉餃

一直好想試下整水晶皮 (潮洲粉果皮),今天終於行動。

皮材料
澄麵 70g
生粉 90g
粟粉 60g
水 180g
鹽 1/8 茶匙
油 6g

辣肉碎

收工回家最簡單就是煮個麵來食，無可能每次也是肉丸/水餃吧！ 這天就做左辣肉碎，加上即食的擔擔麵湯底，變奏的擔擔麵就完成

材料

免治豬肉

蝦米

乾葱頭

冬菇

榨菜

蝦米辣醬

麻辣醬

健康 vs 好味道

健康的食物大多謝味道較淡，有些更難以令人接受，最近都關注自身健康，減低3高指數，所以都減少外食，自煮菜式就要有多D變化，才會豐富味蕾。

這次用左日本無激素雞搥去皮，伴紅蘿蔔同薯仔，日式咖哩油粉較少，食得安心。

豆豉雞

買左包大孖豆豉，試下整豆豉雞，我覺得一般般~

醉豬手

又是超市特價了起我條筋，一包大大包既豬手10蚊

回到家中發現香槽露得半支，即跑落街買，都搵唔到，被迫買左槽鹵同醉雞汁，兩支味道都不及香槽露!

做法

1.豬手飛水去污糟野

2.水4飯碗加鹽1湯匙，花椒八角4粒桂皮1塊，煮滾2分鐘出味後落豬手，我用高速煲煮20分鐘，普通煲中細火煮半粒鐘焗1個鐘，反覆3次應該差唔多，再唔係焗過夜

3. 隔去配料，豬手在水喉水啤水5分鐘

4.熟水沖一次 (唔怕水喉水可免去這步驟)

5. 糟露2飯碗+[加2湯匙紹酒+半湯匙玫瑰露酒就充滿酒味]+一茶匙魚露(淡口d就落半茶匙)+1湯匙糖+話梅4粒(唔落都得)，拌勻後放豬手內，用密實袋就反轉袋方向數次，平放才入雪櫃，咁每舊豬手都浸到汁，隔晚食得。

這個醉豬手功夫多到想放棄，下次再見到豬手特價真係要再認真諗諗，唔好再衝動。

韮菜花炒蜆肉

我總覺得蜆肉用來炒韮菜花才是王道，配其他總是有點格格不入。 在超市見到特價的蜆肉，雙眼發光即放入購物籃，但搵左好耐都無韮菜花，那麼先處理蜆肉吧! 先飛水加點酒在水裡可以去雪櫃味，再加點胡椒粉辟味。

第二天終於無意中在超市見到韮菜花，竟然仲要係特價，當然即買。

用蒜頭爆鑊加入韮菜花兜幾下，再加入蜆肉，再加1茶匙蠔油去提鮮，非常好，岩晒我口味。

整色整水吞拿魚包

趁假期試低溫發酵法，之前一晚將打好了的麵團，放置室溫25分鐘，再放入膠盒內放雪櫃低溫發酵。 翌日早上拿出來回溫約半小時就可以造型。

這天用了罐頭吞拿魚加點沙律醬+黑椒碎+香草，記起家裡有包在日本買回來的木魚片，加在包面上，當堂升呢

唐揚炸雞

要食炸物但又要零罪惡感就得想想辦法...........


從日本買左包炸雞粉，500G 雞肉，炸雞粉一包100G 加水100G拌勻，將切件雞肉放入去醃大約一小時就炸得。 今次我用airfryer，將油加入粉漿內，airfryer無搽油，D雞黐住個網，下次要先爆油再在雞件上爆油再試下效果。

茶樹菇炆豬肉

茶樹菇很有益，除左煲湯，用來蒸雞/炆豬肉一樣好好味。

這個茶樹菇炆豬肉是昨天整的，隔了夜更入味更好下飯。 要似街整的味道，秘訣是先爆香乾葱頭及幾片薑，落豬肉及已浸軟的茶樹菇，用豉油雞汁同少量豉油，再加一小角冰糖和清水，我用鵝姐煲炆左22分鐘，開蓋滾10分鐘收返D汁就會好好入味。 (調味料份量都很隨意，自已試味)

酸蘿蔔

少時常有的餐前小食，因亞姨們都愛這些又甜又酸的小吃，我跟著她們長大，不自經地也有點愛上了~

我D廚神亞姨教落，醃酸蘿蔔要咁切，一舊大約5mm再切2至4刀，愈切得多愈正，食落才有咬口夠爽脆，又襟擺 (方型粒粒1星期就淋唔爽脆)。 好耐無練刀法，好彩手指無事

材料
蘿蔔一條約12兩
白米醋 320G
冰糖 190G


做法:
1. 將蘿蔔切片
2. 加入鹽拌勻，靜止1小時將蘿蔔迫出水份
3. 沖去鹽份，晾乾水
4. 將醋加熱令冰糖融化，可加熱後合上蓋靜止半小時
5. 待醋冷卻後可加入蘿蔔片在玻璃瓶內
6. 放入雪櫃，兩天後可以食用

毛豆雪菜炒年糕

從少豬肉已經不是我杯茶，特別係放湯的肉片，我總認為是非常非常難食。 這天的雪菜肉絲炒年糕，衝破關口，我覺得是最好食的炒豬肉片了~這天用了韓式的cutie年糕，好鬼可愛。

毛豆是在旺角街市5蚊一份的特價品，份量非常之多，去殼後炒雪菜年糕真的非常好味又有營養~

打釜頭之無限擴大

雪櫃剩下1/3棵西芹，加幾片自家制的咸肉，再加雲耳和紅蘿蔔片配襯下，不得之了。。。一大碟了。 這樣的無限擴大打釜頭術真係誇啦啦！

韮菜餡餅

最近迷上了一位美食blogger 小高姐，用她的方子做餅皮，餡料是冬韮菜+菇蝦+米+豬肉，要包到皮薄餡多真係有點難，突別係收口位做得唔好(較厚),下次要用較剪剪去太多的重疊位

皮
高粉 150g
低粉150g
(由於無中筋粉，惟有自已溝)
鹽 1g
温水 105g
水 125g
油 18g

皮真的很黏手，惟有戴手套去處理

餡料：
冬菇4隻
蝦米一湯匙
免治豬肉約3/4飯碗
韮菜1/4斤

做法
加水和鹽將中筋粉搓成麵團
醒麵半小時
加入油再搓至油融入麵團
再醒麵兩小時，麵團就可包入餡料

早起的腸仔包+肉鬆包

大清早6點就自然醒，梳洗後竟然落大雨，費時落街食早餐，找點事來做打發時間，最好就是做麵包了。

份量
高粉200G
低粉50G
水170ML
糖24G

釀鮮菇

無意中在旺角街市見到一份份的特價品，揀左毛豆+薯仔，仲有兩份鮮冬菇都係20個大洋，真係平到無朋友。

冬菇去蒂後加入豬肉、乾蔥粒及蝦米粒釀入後隔水蒸熟，打個薄獻就可食了。

椰汁紅豆糕

做白咖哩剩下大罐椰汁，變身成椰汁紅豆糕，甜品都唔係我杯茶，留比大爺食好啦。

白咖哩香茅豬扒飯

很喜歡沙爹王的白咖哩香茅豬扒飯，個汁真係非常非常好下飯，很久前睇到blogger Candice 教煮的白咖哩，嘩。。。已經好渴望自已動手去煮，無奈先要買樽白咖哩粉。。。。又是一個巧合，某天在士多見到有得賣，嘩。。。仲送埋貨到家，是天意，一定係！！

有了主要的白咖哩粉，卻要出城的大街市買檸檬葉+香茅+南薑，一直也拖了不知幾多個星期。。。。。終於煮了，由於太好味，仲連續兩星期都煮~

Candice 白咖哩香茅豬扒食譜
http://candice-kitchen.blogspot.hk/2016/08/blog-post.html?m=1

迷你牛肉漢堡包

去超市本想買日本蛋做溏心蛋，但全都是mark up 再買一送一，揾笨！ 買蛋不成竟然買左盒免治牛肉，想起很久沒做漢堡包了~

材料

免治牛肉約一飯碗，一般的調味

免治豬肉約兩湯匙，一般的調味

洋葱約1/6個切碎

什香草少量

日式炸粉少量，防止牛肉漢堡出水，煎出來較香口 

醬料

酸青瓜切碎，加入蛋黃醬及少許練奶調味。

磨菇雞批

一字排開雞批。。。。

細路仔時好鍾意食，因為亞媽話貴唔係成日會買比我同細佬食，到自已有能力買，點解D 雞批咁難食既！？ 惟有自已動手整，想加洋葱，走青豆，加磨菇，通通我話事，爽~

皮
高粉 50g
低粉 100g
糖 20g
牛油 80g

餡
啡菇4隻
罐頭磨菇白汁 3湯匙
洋葱1/4個
雞肉約一飯碗

茶樹菇蒸雞

某天收工去「樓上」買煲湯料，忽然好想咁就買了一包8兩裝的茶樹菇。

茶樹菇很有益對身體好，有健脾、止瀉、滲濕、利尿等功效。可以用來治療腎虛尿頻、氣喘、腰膝酸痛、嘔吐等症。常食可起到抗衰老、美容、提高人體免疫力、增強人體防病能力等作用。

很久無食蒸雞，於是試下茶樹菇蒸雞，應該會好味的。在超市買的冰鮮芝麻雞，去皮切件，雞背胸骨部份及腳留來煲湯，調味後放雪櫃半天待入味。

茶樹菇及雲耳用水浸軟，揸水兩三次去菇的up 味及雜質，加少量雞粉及麻油將茶樹菇略調味，雲耳則撈入雞件內索醃雞的調味。

將茶樹菇放碟底，再加上雞件

中火蒸15分鐘，加葱花就完成

茶樹菇索左D雞汁都好好食，下次試下用來蒸排骨。

遲來的元宵慶祝

我對節日很冷感，在fb 見個個都煮咸/甜湯圓賀元宵，遲左一天，趁放假我也來趁熱鬧煮左個偽咸「湯圓」。

材料
蝦米半湯匙
菜甫一湯匙
細冬菇5隻
蟹柳一條
火腿一片
史雲生雞湯兩碗
雞絲約半飯碗
娃娃菜一棵
銀針粉半斤

做法

1.用浸冬菇的水+雞湯，加入冬菇絲煮至滾

2.加入蝦米及娃娃菜煮2分鐘

3.將菜甫、雞絲、蟹柳、火腿絲逐一放入湯中

4.加入銀針粉煮至滾即成

練習卷腸仔包

不知怎的，我卷的腸仔包總是醜醜的，10 個都可以不同型態，這天早起，無所事事就搓個麵團來練習腸仔包，總算有點點成績了，但還是有非常大的進步空間呢！

高粉235g

粗黑麥裸粉20g

低筋粉25g

酵母3g

糖21g

牛油 28g