油鹽水藍青口

我同大老爺對青口既興趣真係零，有次在家樓下食完焗青口飯仲又痾又嘔，大老爺仲入埋醫院住左兩日，青口自此絕跡我們的家。 朋友B話藍青口用鹽水烚熟已經好好食，在吉之島超市買左包1KG一袋$68，果然真係好好食。

芒果士多啤梨卷蛋

對於瑞士卷，我還是整得唔好，一卷就裂，今天用了另一食譜，蛋糕質地易卷好多，這個靚靚的芒果士多啤梨卷蛋就得左喇!

成條蕉上

 

我唔鍾意奶，練習卷蛋時想盡辦法去不用忌廉，這次取而代之是整條香蕉，咖啡味的卷蛋配香蕉，大老爺和我都覺得味道是夾的，拿到公司請同事品嚐，無人話有問題喎!

要多多練習做卷蛋先得

給大老爺的貢品，可惜卷得唔靚，要多多練習先得

咖啡果凍

唔好飲既咖啡粉有大量，唔想益垃圾筒咁浪費，惟有想計善用佢。。。。。。

周末開飯

午餐有冬菇炆雞煲，蒜蓉炒刀豆，蒸鮮竹卷，青紅蘿白湯，食完去街街~

鮮魚片蒸豆腐

鮮魚片除左可以蒸水蛋，仲可以蒸豆腐，放飯面蒸一煲熟，既簡單又方便，係收工回家既最佳選擇!

薯絲煎魚餅

雖然功夫多，我最愛呢個薯絲煎魚餅，脆脆的薯絲好吸引~

紅棗戚風

愛紅棗的香味，用鵝姐煲好紅棗水用篩隔去渣成蓉液偏用，四隻蛋白兩隻黃，分蛋法打起蛋白同蛋黃，90g 糖，菜油約20g,  紅棗蓉液約50g (邊做邊加無去量重了), 180 度焗左28分鐘

人家整甜品都很著重份量，我偏是個率性的人。。。。

第一次整生炒糯米飯

第一次做生炒糯米飯，米浸左3粒鐘，用易潔鑊炒，唔會黐，比我想象中容易，只要小心控制水份，成品唔會差得去邊，加個鹽水浸菜心就一餐。

紅棗戚風

以前成日去深圳按摩，之後到超市入貨，最鍾意買紅棗蛋糕，很濃的紅棗味，可惜太甜又太油，現在無北上了，自己動手第一次整紅棗戚風。 雖然軟熟，但味道唔夠濃，有待改善!

焗西米布甸

食譜來少大少奶
牛油       50g
西米       60g
水         50ml
奶         230ml
糖         80~100g
吉士粉     50g
蛋黃       2個
蓮蓉、荳沙隨意

做法：
1)煲滾水放入西米熄火，焗至半透明、過冷河
2)將牛油、糖、奶、清水加入煲煮至牛油同糖溶化
3)逐少加入吉士粉，要邊煮邊攪至溶化，再加入西米攪至杰身
4)熄火加入蛋黃攪勻，可以入杯
如果你要到加蓮蓉，你就將西米糊入一半加蓮蓉再加入多一半西米糊
200度焗20分鐘，如果未呈現理想焦面可以放上焗爐上層再焗

1)西米半透明就要過冷河，最好浸一陣冰水，會實d唔會太淋身，太淋好易變一pat
2)加入吉士粉要好似上左"摩打"咁快手攪拌，否則好容易會結埋一舊好似鹹蛋黃
3)唔好一開始較太高溫會整溶個西米糊，焗到咁上可以較高少少溫度，或只較上發熱線
4)唔加蓮蓉餡都好食，其實餡可以好多變化自已鍾意就得，你鍾意加豆豉都無問題

鯇魚豆腐煲

收工後的簡餐，鯇魚洗淨抺乾用少少鹽和胡椒粉稍醃，放易潔鑊煎至微金黃先煮會好食D, 薑蒜放LC 煲內爆香，加冬菇，炸豆腐，鯇魚放面加入汁料(蠔油，糖，麻油，生抽) 煮滾再加入豆卜及舞菇再煮多五分鐘，焗大約十分鐘就食得